დაცულ ვებგვერდს უნდა ჰქონდეს მისამართის თავსართად https:// და საკეტის ნიშანი მისამართების ველში. თუ ანგარიშის შესაყვან გვერდს არ გააჩნია დაცული კავშირი, Firefox მისამართების ველში გიჩვენებთ წითლად გადახაზულ საკეტის ნიშანს .

თუ შეიყვანთ პაროლს დაუცველ ვებგვერდზე, მიმყურადებლებსა და შემტევებს შეეძლებათ მისი მოპარვა. აგრეთვე იხილავთ გამაფრთხილებელ შეტყობინებას, როდესაც ჩააწკაპებთ მომხმარებლის სახელის ან პაროლის შესაყვან ველში.

რა უნდა გავაკეთო, როდესაც ანგარიშზე შესვლის გვერდი დაუცველია?

თუ ანგარიშის შესაყვანი გვერდი დაუცველია, შეამოწმეთ დაცული ვერსიის არსებობა მისამართისთვის https:// თავსართის დამატებით. აგრეთვე, შეგიძლიათ დაუკავშირდეთ საიტის ხელმძღვანელობას და სთხოვოთ, უზრუნველყონ უსაფრთხო კავშირი. სხვა შემთხვევაში გირჩევთ, თავი შეიკავოთ ამგვარ საიტზე რამე მონაცემის შეყვანისგან.

დაუცველი გვერდების შესახებ

დაუცველი გვერდები არ უზრუნველყოფს უსაფრთხო კავშირს მომხმარებლებისთვის. სანაცვლოდ გამოიყენება დაუშიფრავი არხი (HTTP) და ნებისმიერი შეყვანილი მონაცემი საფრთხის ქვეშ დგება. გვერდები, რომლებითაც გადაიცემა მეტად პირადი მონაცემები, მათ შორის საკრედიტო ბარათები, სხვა სახის საბუთები და პაროლები, აუცილებლად საჭიროებს დაცულ კავშირს შემტევების მხრიდან ინფორმაციის ხელყოფის ასარიდებლად. არ უნდა შეიყვანოთ რამე პირადი მონაცემი, თუნდაც პაროლი ან პირის ამოსაცნობი სხვა ინფორმაცია, დაუცველი კავშირის მქონე საიტებზე. ვინაიდან ასეთი კავშირისას გადაცემული მონაცემები ყველასთვის ხილულია და ადვილად მოიპარავენ. ვრცლად იხილეთ როგორ გავიგო საიტთან კავშირი არის თუ არა დაცული?.

შემმუშავებლებისთვის

შემმუშავებლებს, რომელთაც სურთ, დაწვრილებით იხილონ ამ გაფრთხილების შესახებ, შეუძლიათ ეწვიონ MDN-ვებმასალების გვერდს. აღნიშნულ მასალებში ახსნილია, თუ როდის და რატომ აჩვენებს Firefox ამ გაფრთხილებას და ასევე მოცემულია ხარვეზის მოგვარების გზები. დამატებით იხილეთ ეს სტატია Mozilla-ს სვეტზე.